ईनेपालपत्र संबाददाता , ५ पटक हेरिएको
लेटाङ, २४ साउन । लेटाङ नगरपालिका–७, वारांगीमा टीका धितालले सञ्चालन गर्दै आएको होटल चेल्सिया एण्ड ट्रेडर्स तथा होलसेल किराना पसलमा भीषण आगलागी भएको छ।
धितालले फमकुमार मगरको घरमा होटल तथा होलसेल किराना पसल सञ्चालन गर्दै आएका थिए। आगलागीबाट घरसहित होटल, किराना पसल तथा पसलमा रहेका सम्पूर्ण सामान जलेर पूर्णरूपमा नष्ट भएको स्थानीयले बताएका छन्।
प्रारम्भिक जानकारीअनुसार विद्युत् सर्ट भएर आगलागी भएको हुनसक्ने आशंका गरिएको छ। आगलागीबाट करोडौँ रुपैयाँ बराबरको क्षति भएको स्थानीयको भनाइ छ।
आगलागीका कारण घर, होटल, किराना पसल, खाद्यान्न तथा अन्य व्यापारिक सामग्रीमा ठूलो क्षति पुगेको बताइएको छ। घटनामा मानवीय क्षति भए/नभएको तथा वास्तविक क्षतिको यकिन विवरण भने प्राप्त हुन बाँकी छ।
प्रकाशित मिति: २०२६-०८-०९ , समय : १५:०९:१७ , १ घन्टा अगाडि