इनेपालपत्र , २३४ पटक हेरिएको
पथरी शनिस्चरे, २ असार । पथरी शनिस्चरे ४ मा नगरकै पहिलो आदिवासी जनजाति महोत्सवको भव्य आयोजना सम्पन्न भएको छ। यस महोत्सवको उद्घाटन नगर प्रमुख मोहन तुम्बापोले गरे।
महोत्सवमा विभिन्न जातिहरूको खानाको विशेषता झल्काउने ९ जातिका फूड स्टलहरू राखिएका थिए। साथै, १३ जातिको सांस्कृतिक प्रस्तुतीले महोत्सवलाई झन् रंगीन बनायो। यस अवसरमा पुरातन सामाग्रीको प्रदर्शनी पनि आयोजना गरिएको थियो, जसले आदिवासी जनजातिको सम्पदाको महत्वलाई उजागर गर्यो ।
महोत्सवको आयोजना ४ नं. वडाको आर्थिक सहयोगमा गरिएको हो भने यसबारे वडाध्यक्ष लोककिरण न्यौपानेले जानकारी दिएका छन्। महोत्सवले स्थानीय नागरिकलाई सम्मान गर्दै उनीहरूको संस्कृति र परम्परालाई जगेर्ना गर्ने उद्देश्य राखेको छ।
नगर प्रमुख मोहन तुम्बापोले महोत्सवको उद्घाटन गर्दै आदिवासी जनजातिको सांस्कृतिक धरोहरलाई संरक्षण र प्रवर्द्धन गर्न स्थानीय तहले निरन्तर प्रयास गर्ने बताए।
वडाध्यक्ष लोककिरण न्यौपानेले महोत्सवको सफलतामा योगदान दिने सबैलाई धन्यवाद व्यक्त गर्दै आगामी दिनमा पनि यस्ता कार्यक्रमहरूको आयोजना गरी समुदायलाई एकत्रित गर्ने प्रतिवद्धता जनाए।
यस महोत्सवले पथरी शनिस्चरेलाई संस्कृतिको एक महत्वपूर्ण केन्द्रका रूपमा स्थापित गर्न सहयोग पुर्याएको छ। स्थानीय बासिन्दा तथा आगन्तुकहरूले महोत्सवको रमाइलो वातावरणको मज्जा लिएर प्रशंसा व्यक्त गरे।
आदिबासी जनजाति माहासङ वडा न ४ का अध्यक्ष भर्तधोज लिम्बू को अध्यक्षतामा भएकाे कार्यक्रममा पथरी शनिस्चरे लगायत आसपासका जनसमुदायकाे बाक्लाे उपस्थिति रहेकाे थियाे ।
प्रकाशित मिति: २०२४-०६-१६ , समय : १४:१८:४६ , १ वर्ष अगाडि