ईनेपालपत्र संबाददाता , ७ पटक हेरिएको
काठमाडौँ३० असार । मनकामना इन्जिनियरिङ हाइड्रोपावर लिमिटेडको ५४ लाखभन्दा बढी कित्ता सेयरको लक–इन अवधि आगामी भदौ २ गतेपछि समाप्त हुने भएको छ। लक–इन अवधि सकिएसँगै कम्पनीका संस्थापक, स्थानीय बासिन्दा र कर्मचारीको नाममा रहेको निश्चित परिमाणको सेयर दोस्रो बजारमा कारोबारका लागि खुला हुनेछ।
कम्पनीका अनुसार लक–इनबाट मुक्त हुने कुल सेयर संख्या ५४ लाख २३ हजार ३८० कित्ता रहेको छ। यसमध्ये ५२ लाख कित्ता संस्थापक समूहको स्वामित्वमा रहेको छ भने स्थानीय बासिन्दाका लागि छुट्याइएको १ लाख ८३ हजार ३८० कित्ता र कर्मचारीका लागि वितरण गरिएको ४० हजार कित्ता सेयर पनि लक–इनबाट मुक्त हुनेछन्।
लक–इन अवधि समाप्त भएपछि सम्बन्धित सेयरधनीले प्रचलित नियमअनुसार सेयर कारोबार गर्न सक्नेछन्। यद्यपि, कम्पनीका सञ्चालक समितिका पदाधिकारी तथा उच्च व्यवस्थापन तहमा कार्यरत कर्मचारीको नाममा रहेको सेयर भने विद्यमान कानुनी व्यवस्थाअनुसार तत्काल खरिदबिक्री गर्न नपाइने कम्पनीले स्पष्ट पारेको छ।
विश्लेषकहरूका अनुसार यति ठूलो परिमाणको सेयर कारोबारका लागि खुला हुँदा दोस्रो बजारमा आपूर्तिको दबाब बढ्न सक्ने सम्भावना रहन्छ। त्यसैले कम्पनीको सेयर मूल्य र कारोबारको प्रवृत्तिमा यसको प्रभाव देखिन सक्ने अनुमान गरिएको छ।
प्रकाशित मिति: २०२६-०७-१४ , समय : ०९:४३:१३ , ३ घन्टा अगाडि