ईनेपालपत्र संबाददाता , १ पटक हेरिएको
उदयपुर, १ असोज । उदयपुरको पश्चिमी भेग कटारीबाट सशस्त्र प्रहरी बलले ठूलो मात्रामा गाँजा बरामद गरेको छ। सशस्त्र प्रहरी बल नेपाल, ५ नम्बर हेडक्वाटर त्रियुगामातहत रहेको कटारी बेस क्याम्पको टोलीले कटारी नगरपालिका–६ स्थित साँघुरी नजिकैबाट १३० किलो गाँजा बरामद गरेको हो।
विशेष सूचनाका आधारमा खटिएको टोलीले बुधबार राति कटारीको साँघुरीबाट करिब ५ किलोमिटर दक्षिण चुरे जङ्गल क्षेत्रमा खानतलासी गर्दा उक्त परिमाणको गाँजा फेला पारेको हो। पैदल यात्रा गर्दै गाँजा बोकेर ल्याउँदै गरेका व्यक्तिहरू सशस्त्र प्रहरीको गस्ती टोलीलाई देख्नासाथ गाँजा छाडेर फरार भएका थिए।
कारबाहीका क्रममा उनीहरूले छाडेर भागेको स्थानबाट प्रहरीले गाँजाले भरिएका ५ वटा बोरा बरामद गरेको छ। बरामद गाँजा आवश्यक कानुनी कारबाही तथा अनुसन्धानका लागि इलाका प्रहरी कार्यालय कटारीको जिम्मा लगाइएको छ। प्रहरीले घटनामा संलग्न फरार व्यक्तिहरूको खोजीका साथै थप अनुसन्धान अघि बढाएको जनाएको छ।
प्रकाशित मिति: २०२६-०९-१७ , समय : १०:३८:५६ , १ घन्टा अगाडि