‘चारदाम’को च्यारेटी शो विराटनगरमा असार २२ गते

कोशी भिजन फिल्म्स प्रालि ईटहरीद्धारा निर्माण गरिएको यो चलचित्र तामाङ संस्कृतिमा आधारित छ। फिल्मका लेखक तथा निर्देशक लाखमान योञ्जनले तामाङ जातिमा हराउँदै गइरहेको भाषा, लिपि, भेषभुषा, कला, संस्कार र संस्कृतिको संरक्षण तथा सम्बर्द्धन गर्ने उद्देश्यले ‘चारदाम’ निर्माण गरिएको बताए।

चलचित्रमा सुवास योन्जन तामाङ, सुकुमाया मोक्तान तामाङ, मदन राई, मोहन लोप्चन तामाङ, शान्ति पाख्रिन तामाङ, पूर्ण लिम्बू, बालकलाकार सुम्निमा योन्जन तामाङ, डम्बर किमारी मेन्याङ्बो र मेनुका राई लगायतका कलाकारको अभिनय रहेको छ। फिल्मको छायांकन पूर्वका भोजपुर, सुनसरी लगायतका विभिन्न रमणीय स्थलहरूमा गरिएको हो।

नेपाल तामाङ घेदुङ महानगर समिति विराटनगरको समन्वयमा आयोजना गरिने यस कार्यक्रमको क्रममा विभिन्न क्षेत्रमा योगदान पुर्याउने व्यक्तित्वहरुलाई सम्मान गरिने पनि जनाइएको छ।

यस च्यारेटी शोबाट तामाङ समुदायको सांस्कृतिक धरोहरको जगेर्ना गर्न सहयोग गरिने अपेक्षा गरिएको छ।