निशा दाहाल , ३२९ पटक हेरिएको
पथरीशनिश्चरे, २२ असार । पथरीशनिश्चरे नगरपालिका वडा नम्बर ४ ले किसानहरूको उत्पादन लागत घटाउने र कृषि कार्यलाई सहज बनाउन विषादी छर्ने ट्याङ्की वितरण गरेको छ । किसानहरूको लागत साझेदारीमा गरिएको उक्त वितरण कार्यक्रममा दर्जनौँ किसानलाई ट्याङ्की उपलब्ध गराइएको वडाले जनाएको छ ।
वडाका अनुसार किसानहरूले ट्याङ्कीको कुल मूल्यको २५ प्रतिशत रकम मात्रै तिरेका छन् भने बाँकी ७५ प्रतिशत खर्च वडा कार्यालयले व्यहोरेको हो । यसरी वितरण भएका ट्याङ्की करिब ६५ घर समूहका किसानहरूले पाएका छन् । वडा कार्यालयले विशेषगरी साना तथा मझौला किसानलाई प्राथमिकतामा राखेर वितरण गरेको जनाएको छ ।
वडाध्यक्ष लोककिरण न्यौपानेले विषादी छर्ने ट्याङ्की वितरणले कृषिमा आधुनिक प्रविधिको पहुँच विस्तार हुने, विषादी छर्ने काम छिटो र प्रभावकारी हुने र किसानलाई समय तथा श्रम बचत हुने विश्वास व्यक्त गरेका छन् । उनका अनुसार, विषादी छर्ने ट्याङ्कीको प्रयोगले विषादीको समान रूपमा छर्काइ गर्न सहज हुने र बालीमा लाग्ने रोग तथा किराको प्रकोप नियन्त्रण गर्न पनि मद्दत पुग्नेछ ।
वडाले आगामी दिनमा कृषकहरूको आम्दानी वृद्धि र उत्पादनमा सुधार ल्याउन थप उपकरण, तालिम र प्राविधिक सहयोगका कार्यक्रमलाई निरन्तरता दिने जनाएको छ । किसानहरूले पनि वडाको यो पहलको प्रशंसा गर्दै आफूहरूको कृषि कार्यलाई ठूलो सहजता पुगेको बताएका छन् ।
प्रकाशित मिति: २०२५-०७-०६ , समय : १९:०९:४१ , २ महिना अगाडि