Enepal Patra Pvt. Ltd. , ५५४ पटक हेरिएको
काठमाडौं, २४ माघ । नेपाली कांग्रेसले प्रतिनिधिसभा विघटन विरुद्धको आन्दोलन एवं सभा गर्दा जनतालाई दुःख नदिइ शान्तिपूर्ण रूपले प्रदर्शन गर्न आग्रह गरेको छ ।
शुक्रबार प्रेस विज्ञप्ति जारी गर्दै कांग्रेसले प्रतिनिधिसभा विघटनको असंवैधानिक कदम विरुद्धको प्रदर्शनलाई अझ व्यापक बनाउने जनाउँदै जनताले दुःख पाउने गरी बन्दको आह्वान नगर्न अपिल गरेको हो । कांग्रेसले सडकमा विरोध प्रदर्शन गरे पनि बन्दको कार्यक्रम नगरेको र नगर्ने भन्दै दृढता व्यक्त गरेको छ ।
संवैधानिक परिषद सम्बन्धी संविधानमा व्यवस्था गरिएको प्रावधान, मर्म र विधिलाई वर्तमान सरकारले सुरु देखिनै कुल्चँदै आएको कांग्रेसको निष्कर्ष छ । संवैधानिक परिषद् सम्बन्धी अध्यादेश जारी गर्ने सरकारको कदम असंवैधानिक र स्वेच्छाचारी भएको कांग्रेसको ठहर छ । उसले अध्यादेशपछिको बैठक र पछिल्लो सपथग्रहणलाई असंवैधानिक भनेको छ ।
कांग्रेसले माघ २४ गते हुने शुभेच्छुक संस्थाहरुको प्रदर्शनमा साथ दिन लोकतन्त्रवादीहरूलाई आह्वान गरेको छ । साथै दम्भ र द्वन्द्वको परिणाममा संविधानको मर्म विपरीतको कर्म गर्ने सर्वसत्तावाद उन्मुख प्रवृत्ति विरुद्ध संघर्ष जारी रहेको कांग्रेसले जनाएको छ ।
प्रकाशित मिति: २०२१-०२-०६ , समय : ०८:५५:१० , ३ वर्ष अगाडि