प्रशान्त निरौला , १३८ पटक हेरिएको
लेटाङ, माघ १३। लेटाङ नगरपालिकाका प्रमुख प्रशासकिय अधिकृत नारायण न्यौपानेले करिब २२ महिना कार्यकालमा नगरको प्रशासनिक, विकास, र संरचनात्मक सुधारका क्षेत्रमा उल्लेखनीय योगदान पुर्याएका छन्। उहाँको नेतृत्वमा भएका महत्वपूर्ण कामहरूले लेटाङ नगरपालिकालाई नयाँ उचाइमा पुर्याएको छ।
न्यौपानेको कार्यकालमा “असारे विकास” को प्रवृत्तिलाई निरुत्साहित गर्दै वार्षिक योजना तथा कार्यक्रम वैशाख मसान्तभित्र सम्पन्न गर्ने परिपाटीको थालनी गरिएको छ। यसले योजनाबद्ध र समयमै काम सम्पन्न गर्ने संस्कारको विकास भएको छ। LISA/FRA प्रणाली र कार्यसम्पादन सूचकमा सुधार ल्याई नगरपालिकाको प्रगतिमा उल्लेखनीय वृद्धि गरिएको छ।
उहाँको नेतृत्वमा प्रशासनिक र राजनीतिक सन्तुलन कायम गर्न विशेष भूमिका निर्वाह गरिएको छ। कर्मचारीहरूको संस्थागत क्षमता विकास गर्दै सेवा प्रवाहलाई सरल, सहज, र पारदर्शी बनाइएको छ। यसले संस्थागत सुशासनलाई मजबुत बनाउन मद्दत पुर्याएको छ।
डिजिटल प्रविधिको प्रयोगलाई प्रोत्साहन गर्दै अनलाइन दर्ता चालानी, राजस्व भुक्तानी (QR कोड), डिजिटल नागरिक वडापत्र, र हेल्पडेस्कको व्यवस्था गरिएको छ। नगरपालिकाको कार्यालय भवनलाई व्यवस्थित गर्दै सभाहलमा स्मार्ट बोर्ड, मेयर र उपमेयरका कार्यकक्ष, र न्यायिक समितिका इजलासलाई सुधार गरिएको छ।
पुरानो बेरुजु फछ्र्योटमा विशेष पहल गर्दै करिब पाँच करोड रकम फछ्र्योट गर्ने सफलता उहाँको अर्को उपलब्धि हो। चालु आर्थिक वर्षका ठेक्कापट्टा र उपभोक्ता परियोजनाहरू समयमै अगाडि बढाइएको छ, जसमा ९० प्रतिशत ठेक्कापट्टाका काम सम्पन्न भइसकेका छन्।
न्यौपानेको पालामा नगरपालिकाको ऐन, कार्यविधि, निर्देशन, नीति, र आचारसंहिताका ३३ कानुन निर्माण तथा १० कानुन संशोधन भएका छन्। यसले नगरपालिकाको विधिसंगत कार्य सञ्चालनलाई अझै बलियो बनाएको छ।
नगरपालिकाको आवधिक योजना, यातायात गुरुयोजना, पर्यटन गुरुयोजना, र राजस्व सुधार योजना पुस्तकका रूपमा प्रकाशन गरी नगरलाई योजनाबद्ध विकासको दिशामा अगाडि बढाइएको छ। चुरे क्षेत्रका खोलाजन्य पदार्थको व्यवस्थापन, सार्वजनिक जग्गाको तथ्यांक प्रकाशन, र गरीब परिवार पहिचानजस्ता कामलाई पनि प्राथमिकतामा राखिएको छ।
सामाजिक संजाल र मिडियामा नगरको सकारात्मक छवि निर्माण गर्दै नकारात्मक प्रचारलाई न्यूनीकरण गर्न सफल हुनु उहाँको थप उपलब्धि हो। न्यायिक समितिको विगत सात वर्षका कामहरूको विवरण प्रकाशन तथा वडा नं ७ मा अस्थायी प्रहरी चौकी स्थापनाले सुरक्षा र न्यायिक पहुँचलाई सुदृढ बनाएको छ।
यस्ता बहुआयामिक उपलब्धिका कारण नारायण न्यौपानेको नेतृत्वलाई लेटाङका जनप्रतिनिधि, कर्मचारी, र स्थानीयले उच्च प्रशंसा गरेका छन्। उहाँले आफ्नो कार्यकालमा देखाएको प्रतिबद्धता र योजनाबद्ध कामले लेटाङ नगरपालिकालाई उदाहरणीय बनाउन ठूलो भूमिका खेलेको छ।
न्यौपानेको झापाको कन्काई नगरपालिकामा सरुवा भएको छ। उहाँले कन्काई नगरपालिकामा प्रमुख प्रशासकिय अधिकृतको जिम्मेवारी सम्हाल्नुहुनेछ।
प्रकाशित मिति: २०२५-०१-२७ , समय : ००:०८:४१ , २ महिना अगाडि