ईनेपालपत्र संबाददाता , ५ पटक हेरिएको
काठमाडौं, २८ भदौ । बाढी तथा पहिरोका कारण देशका विभिन्न स्थानमा मुख्य राजमार्ग तथा सहायक सडकखण्डहरू अवरुद्ध भएका छन्। नेपाल प्रहरी र सडक विभागको विवरण अनुसार कोशी, बागमती र गण्डकी प्रदेशका धेरैजसो मुख्य सडकखण्डमा यातायात सेवा प्रभावित भएको हो।
बागमती प्रदेशका सडकहरू सबैभन्दा बढी प्रभावित बनेका छन्। काभ्रेस्थित बीपी राजमार्गको कुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई ध्यानमा राख्दै समयगत प्रतिबन्ध लगाइएको छ। जसअनुसार १० टनसम्मका मालवाहक सवारी साधनलाई रातिको समयमा मात्र सञ्चालन गर्न दिइएको छ भने मिनी तथा साना सार्वजनिक यात्रुवाहक सवारी साधनलाई तोकिएको समय तालिका अनुसार सञ्चालन गर्ने व्यवस्था मिलाइएको छ।
यसैगरी सिन्धुपाल्चोकको भोटेकोशी गाउँपालिका–२ घट्टेखोलास्थित अरनिको राजमार्ग र रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी सडकखण्ड बाढी र पहिरोका कारण पूर्ण रूपमा अवरुद्ध भएका छन्। नुवाकोटका विभिन्न स्थानका साथै पासाङल्हामु सडकखण्डमा पनि यातायात प्रभावित भएको छ। पहिरोको उच्च जोखिमका कारण टोखा–छहरे सडकखण्डमा भने राति १० बजेदेखि बिहान ५ बजेसम्म सवारी सञ्चालनमा रोक लगाइएको छ।
धादिङस्थित पृथ्वी राजमार्गको बेनीघाट रोराङ गाउँपालिका–७ कृष्णभीरमा पहिरो जाँदा सडक पूर्ण रूपमा ठप्प भएको छ भने सोही गाउँपालिकाका अन्य स्थानमा सडक एकतर्फी मात्र सञ्चालनमा ल्याइएको छ। चितवनको नारायणगढ–मुग्लिन सडकखण्डअन्तर्गत तुइनखोला क्षेत्रमा मर्मत कार्य भइरहेकाले गाडीको चाप हेरेर पालैपालो एकतर्फी रूपमा गाडी छाड्ने गरिएको छ।
उता कोशी प्रदेशअन्तर्गत पाँचथरको फालेलुङ गाउँपालिका–४ आसपास फिदिम–फालेलुङ सडकखण्ड पहिरोका कारण पूर्ण रूपमा ठप्प बनेको छ।
गण्डकी प्रदेशको मनाङस्थित नासों गाउँपालिका–३ धारापानीमा चामे–बेँसीसहर सडकखण्डमा बाटो निर्माणको काम भइरहेकाले यातायात प्रभावित भएको छ। उक्त खण्डमा साना सवारी साधन सञ्चालनमा रोक लगाइएको छ भने ठूला सवारीका लागि समेत निश्चित समय तोकेर सडक बन्द गर्ने गरिएको सडक विभागले जनाएको छ।
प्रकाशित मिति: २०२६-०९-१३ , समय : १०:४६:५२ , २ घन्टा अगाडि